Белиждин спортсменар Москвадиз фида

0
8

И йикъара Избербашда кикбоксингдай  СКФО-дин кlвен­кlве­чивал патал  чемпионат кьиле фена. Ана Чечен­ Респуб­ликадай, Ингушетиядай, Ставропольский край­дай, Кабардино-Балкариядай, Кеферпатан Осетия-Аланиядай ва Дагъустандай 300-лай гзаф спортсменри иштиракна. Гьа жергедай яз РД-дин хкянавай командадик кваз ана тренер-муаллим Шагьмурад Залован гъилик вердишвилер къачузвай — Белиж поселокдин 2-нумрадин ДЮСШ-дин командадини.

Вад юкъуз давам хьайи акъажунра гьарда вичин заланвилин дережадай гъалибвал къазанмишун патал бягьсер кьиле тухвана.

Нетижада чи спортсменри лайихлу чкаярни кьуна:

Рамазан Халилов — фулл-контакт разделдай 1-чка, (67 кг);

Мегьамедшафи  Севзиханов  — жаванрин арада 1-чка, (66 кг);

Мурад  Къарибов —  жаванрин арада 2-чка, (70 кг);

Алим  Межидов —  гъвечlи жаванрин арада 2-чка, (33 кг);

Къалабег  Юзбегов  — фулл-контакт с лоу- киком разделдай 2-чка,  (67 кг);

ИкI, Белиждин кьуд спортсмен кикбоксингдай Россиядин кlвенкlвечивал патал  апрелдиз Москва шегьерда кьиле фидай чемпионатда иштиракдай путевкайриз лайихлу хьана.

Идалай гъейри, спортсменрин тренер  Шагьмурад  Залов  акъажунрин “Хъсан судья” ва “Хъсан рефери” лагьай тlвараризни лайихлу хьана. Адав и дережаяр тестикьарнавай грамотаяр  СКФО-дин Кикбоксингдин Федерациядин президент  Авусалатдин  Мегьамедова  вахкана.

Чи спортсменриз Москвада кьиле фидай чемпионатда агалкьунар хьун алхишзава!

Къагьриман Ибрагьимов

Добавить комментарий