«Аялар чи гележег я»

0
4

Аялар чи гележег я

Аялар чи гележег я

Аямрилай аямралди.

Бахтунин чIехи куьлег я,

Диден буба аялралди.

 

Балайриз дуьз тербия гун

Везифа я чIехибурун.

Гьардаз вичин кIвалах чир хьун

Буржи кар я гъвечIибурун.

 

Диде-бубад лагьай рекьяй

Фейи бала бахтлу жеда.

ЧIехи мурад  атай рикIяй,

Кьилиз фена, гьахълу жеда.

 

Гележегди цуьк гъун патал

Вун дуьньядиз килиг, бала.

ЭкъечIайла кIваляй патал,

Жувахъ тупIал гилиг, бала.

 

Гьич садрани тахьурай вун

Масадал вил алай бала.

Кьил виневаз акурай вун,

ТуькIуьрзавай цIийи къала.

 

Акьулдалди кIвалах авур

Кас рекьелай алатдайд туш.

Сабурдалди гафар лугьур

Бала виляй аватдайд туш.

 

Гележег ви бахтлу жеда,

Эгер вахъ халкь агъазватIа.

Хизанни ви бахтлу жеда,

Ваз гележег аквазватIа.

 

Диде

Акъваз, диде, ваз акьван фад хъел къвемир.

Ви велед я, вуна къе заз шел гъимир.

Вуна хайи бахтсуз велед вилик ква.

Ам Аллагьдин регьимвилин гъилик ква.

 

Яб це, диде, на гафарин манадиз,

Яргъал физвай зи женгерин цIаяриз:

Чи балаяр агакьрай чеб мурадрихъ,

Уьмуьр физва, рахазва зун гъуцарихъ.

 

Зун бахтунихъ къекъвезва, гел тийижиз,

ГьинватIа ам жедан завай жагъуриз.

Девирри чун тунва вичин члада.

КIан я рикIиз къекъвез секин чкада.

 

Террористриз ваъ!..

Вуч хабар я къвезвайди чи япариз,

Инай — анай цIай акъатиз, кукIвариз?

Гьар патахъди чикIиз куьлуь якIариз,

Аквазва хьи жегьил чанар вилериз.

 

Вучиз, вучиз гьайиф къвезвач чанарин?

Уьмуьр физва, къадир авач танарин.

Ни кьурай бес вилик пад и маларин?

Халкь гьатнавай лап и четин гьаларин?

 

Террористар — оптимистар я лугьуз,

Тикрарзава чIуру гафар гьар юкъуз.

Вуж тахсир яз, ийизва чи кьил агъуз­,

Кими ийиз жегьил-агьил, пул къалуз­.

 

Чун акси я ихьтин чIуру кIвалахриз.

Гуз кIанзава лянет кими алчахриз.

Лагълагъ ягъиз, кIуф къекъуьрдай ялтахриз

Гьич рехъ гудач яру ивид булахриз…

 

Важибат Насруллаева, КIварчагъ

 

Добавить комментарий