Дуьньяда

0
21

Виридалайни яшлу агьали кьена

Чилел виридалайн­и яшлу агьали яз гьи­са­бай итальянви Эмма Морано 117 йисни 137 йи­­къан яшара аваз кечмиш хьана. Идан гьа­къин­дай 15-апрелдиз “La Rapublica”- ди хабар гана.

Дишегьлиди вич яргъал яшамиш хьунин сир йикъа пуд кака, регъвенвай як ишлемишун ва ялгъузвал яз гьисабзавай.

2016-йисан майдиз американви дишегьли Сузанна Мушатт Джонс кьейидалай гуьгъуьниз Морано дуьньядал виридалайни яшлу дишегьли яз гьисабна. Итальянви дишегьли гьакIни 1900-йис алукьдалди хайи эхиримжи кас тир.

2016-йисуз 120 йисан яшда аваз китайви  Фу Суцин кьейидан гьакъиндай хабар ганай.

Танкунай — къизилар

Великобританиядай тир коллекционер Ник Мидаз Советрин Т-54 маркадин танкунай 2 мил­лион фунт стерлингдин (2,5 миллион доллар) къимет авай къизилдин 5 кIалуб жагъана­.

55 йис хьанвай Мида “eBay” интернет- аукциондай 37 агъзур доллардай танк маса къачуна. Къизилдин кIалубар адаз механик Тодд Чемберленахъ галаз санал къачунвай шей ахтармишдайла, кудай шей цадай бакдай жагъана. Коллекционер аламат хьана амукьна, ада полициядиз эвер гана, полицейскийри адавай, расписка гана, къизилар вахчуна.

“Зав къизилар вахкун тавуртIани, захъ лап хъсан танк амукьда”, — малумарна британвиди.

­Ада маса къачур Т-54 маркадин танк Ирак­­дин яракьлу къуватринди тир ва ада 1990-1991-йисара Персидский заливда кьиле фейи дяведа иштиракна. Гьа вахтунда ам международный коалициядин кьушунри (Великобританияни и коалициядик квай) кьуна ва Сад хьанвай Пачагьлугъдиз хкана.

Мидан фикирдалди, Иракдин военныйри кудай шей цадай бакда Кувейтдин хазинайрай тир къизил чуьнуьхна.

1959-1968-йисара СССР-ди Багъдаддиз Т-54 маркадин тахминан 300 танк рекье туна. Гуьгъуьнлай заливда хьайи дяведилай гъейри, абур 1973-йисуз Арабринни Израилдин ва 1980-1988-йисара Ирандинни Иракдин арада хьайи дяведа ишлемишна.

“Маугли” — руш

Индиядин кеферпатай  тама маймунрихъ галаз яшамиш хьайи руш жагъана. Идан гьакъиндай “Times of India” газетди кхьизва.

Газетди къейдзавайвал, аял полициядин къуллугъчи Суреш Ядаваз Катарниагхат  (Ут­тар-Прадеш штат) къурухдин мулкуна къе­къве­дай вахтунда жагъана.

Тахминан 8 йис хьанвай руш яхун тир, адал парталар алачир. Ам къалин тамай вахчудайла, маймунри гьараяр ийиз, чпин наразивал къалурзавай, руш вични и кардиз акси тир. Поли­цейский куьмекдиз вичин юлдашриз эвер гуниз мажбур хьана.­

Къейдзавайвал, аялдиз рахаз чидач, ада чилелай незва ва ам капалай физва.

Руш округдин больницадиз агакьарна, полиция “маугли” вуж ятIа ва аял тамуз гьикI акъатнатIа тайинариз чалишмиш жезва.

2,5 йисалай…

Америкадин Нью-Джерси штатдин Ванакью шегьердин агьалидиз кьве йисалай гзаф вахт идалай вилик катай вичин кац жагъун хъувуна. Идан гьакъиндай “The Rekord” газетди хабар гузва.

Квахьай кац виликан кIваливай 15 километрдин яргъай, живедин тIурфан акъатайдалай гуьгъуьниз жагъун хъувуна. Гьайванар­ хуьзвай чкадин къуллугъчийри “Facebook”-да чапнавай кацин шикил адан иесидиз акуна.­

Гьакъикъатдани ам вичин кац ятIа чирун патал, иеси адан патав кацин рикI алай игрушкани гваз атана.

Дишегьлиди “The Rekord” газетдин журналистдиз суьгьбет авурвал, ада кацин тIвар кьуна эверна: “Джимми, им вун яни, дуст?” “Ам садлагьана зав агатна, за кьил эцяна ва вичин нер игрушкадив агудна”, — лагьана ада.

Джимми 2014-йисан сентябрдиз квахьнай. Ам нянрихъ куьчедиз ахъаяйдалай гуь­гъуьниз­ кIвализ хтаначир. Иесияр адахъ патарив гвай  чкайра къекъвена, цларал малуматар алкIур­на, полициядиз ва гьайванар хуьдай кIвализ фена, амма са нетижани арадал атаначир.

2016-йисуз Британиядин Харрогейт шегьердин агьалидив 14 йисан вилик квахьай кац вахканай.

Гьазурайди — Шагьисмаил  Гьажимирзоев

ПОДЕЛИТЬСЯ
Предыдущая статьяГафар-чIалар
Следующая статьяСа тIимил хъвер

ОСТАВЬТЕ ОТВЕТ

Войти с помощью: 
Please enter your comment!
Please enter your name here