Гъетерихъди рекье…

0
62

ГЕНЕРАЛ РАМАЗАН ЖАФАРОВАН 60 ЙИС

Генерал  Рамазан  Жафарович  Жафаров… Чи дустунин ва амадагдин, Да­гъустандин чIехи рухвайрикай садан (Р.Ж. ­Жафаров РД-дин Гьукуматдин Председателдин заместитель, гзаф маса шабагьрихъ (награда) галаз санал “Дагъустан Рес­публикадин вилик лайихлувилерай” ордендин сагьибни я) и йикъара 60 йис тамам жезва. Халис итимар патал им чпин вири алакьунар бегьерлувилелди кардик кутадай лап кутугай вахт я. Рамазан Жафа­ровичани алай вахтунда багъри республика патал лап кар алай везифаяр бегьемарзава. Ада чи къанун-къайда хуьдай органрин (къурулушрин) кIвалахдиз къаюмвалзава, республикадин агьалийриз, са куьни­хъайни къурху, хата авачиз, зегьмет чIугва­дай, ял ядай, кIелдай, къуллугъдай — яша­йиш кьиле тухудай мумкинвилер хуьзва!

Дагъустандин гьалар са шумуд йисан идалай виликанбур яз амачирдакай республикадин Кьил Р.Абдулатиповани хейлин мя­­рекатрал малумарнава. А хъсан мум­кин­ви­лерин кьилевайди вич руьгьдиз хци, гъилиз михьи, къастуниз уьтквем, гафуниз мягькем, ниятриз экуь инсан — чи генерал я! Къурушви хва Жафаров Рамазан Жафарович!

Са мярекатдал за адаз ихьтин чIалар багъишнай:

Далдам-зуьрне ала мад чи гъенерал,

Тебрикзава чи кьегьал хва генерал.

Адан таъсиб Яру дагъ хьиз вине я!

Кьакьан Къуруш вичин асул бине я!

Къамат, кьуршах — къакъуд тежердагъви я!

РикIевайди къаф лекьерин иви я!

Сергьят хуьниз къеле я ам, желе я!

Ислягь йикъаз тав туькIуьрдай фяле я!

Къуй яшари артухрай ви лигимвал!

Асирри мад тебрикда ви Итимвал!..

Зи рикIел Рамазан Жафарович, генералдин чинда аваз, ЦIийи Къурушдал сифте яз хъфей вахт ва ана къурмишай шадвилерни алама. Вичин муаллимрин патав ада гьелени вич аял яз гьиссзамай. Амма ам чIехи уьлкве­дин сергьятар хуьзвай кьушундин лап кар алай командиррикай сад тирди ам межлисдин­ трибунадихъ атайла, адан парталар (генералдин форма), хурудал алай чIехи шабагьар ва лишанлу знакар акурла, хъсандиз кьатIуниз жез­вай. Ам вич рахайла, адан гьа­къиндай ма­са ксарини лагьайла, генералдин къаш-къамат­ гьар садан вилик генани дериндай ачух жез­вай­.

Хасавюрт райондин а чIаван администрациядин кьил Абдурагьим Бексултанова лагьай гафарни зи рикIел алама: “Къурушви рухвайри неинки са хайи хуьруьн, неинки са лезгийрин, гьакI вири Дагъустандин халкьарин тIварни виниз акъуднава. Ихьтин рухваяр галай чаз са душмандихъайни кичIе туш…”

Райондин администрациядин кьили гена давамарнай: “Къурушвияр неинки зегьметдин игитар, абур женгерин зурба къагьриманарни я! Нажмудин Самурский, Шагь-Эмир Мурадов, Агъабег Уружев, Сейфедин Къулиев, Даниял Гьафизов, Гьасен Балатов, Ша­мил Асланов, Седредин, Аскер, Ризван Жафаровар, Забур, Загьраб, Малик Баглиевар — ихьтин викIегь рухвайрин ирс гила жегьилри давамарзава…”

И гафарин гьахълувал гьа межлисдал вил вегьейлани чир жезвай. ГьикI хьи, межлисдин трибунада генералдин патав къурушвийрикай 8 кас полковникар ацукьнавай.

А чIаван полковник Шамил Аслановаз генералвилин чин гун къейд авур шадвилин межлисда (анани чна газетдин векил яз ишти­ракна) са суфрадихъ къурушви 14 полковник­ ацукьнавай. Межлисда лагьайтIа, абурун кьадар мадни гзаф тир.

Им вуч лагьай чIал я? Са гаф лугьуз жеда: Къурушдал женгининни аскервилин кIвалах лап вини дережада эцигнава. Ина ватанпересвилинни вижданпересвилин рекьерай садавайни инкариз тежедай дурумлу адетар арадал атанва.

Чи фикирдалди, акьалтзавай несилрик женгчивилин гьиссер сифтени-сифте хайи чилин, иллаки хайи хуьруьн, халкьдин тарих­ди­ кутазва. Анжах а тарих несилриз чирна кIан­да. Ватандин ЧIехи дяведиз 1941-1945-йи­сара Къурушдилай 570 кьегьал хва рекье ту­на. Абурукай саки 400 кас элкъвена хтанач­.

Къурушдилай 21 касди Афгъанистандин дяведа иштиракна. Кьве кас — Мейланов Къурбан ва Эскендаров Якъуб — а дяведа телеф хьана.

Къе лагьайтIа, гьам чи государстводин кьушундин частара, гьам законар хуьдай ­ор­ган­­ра, къуватдихъ галаз алакъалу тир ма­са къурулушрани къуллугъзавай къурушвийрин кьадар лугьуз хьун мумкин туш. Къурушви ве­­теранрини муаллимри, жегьилрини жа­ван­ри дявейрай тахтай са касни рикIелай алуд та­вун патал чпелай алакьдай вири крар ийизва­.

Зи рикIел, вичин хциз генералдин чин ганвайди чир хьайила, буба Жафара (адан патав чун тебрикиз фенвай) лагьай гафар хквезва: “Генералар яз хазвайди туш, рикIин чIехи къастунини руьгьдин чIехи зегьметди ахьтин дережайрихъ фидай мумкинвал гузва…”

И гафари зи къелемдикни юзун кутунай:

Генералар яз хадайди туш,

Фидайди я арш атIуз.

Гъетерни гьакI къведайди туш,

Гъидайди я къаш атIуз.

Кьуд хва — кьуд лекь гьа са мукай,

Успатзавай итимвал!

ГанатIа квез гьи Гъуцра пай,

Гьинай ятIа лигимвал!

Къежел, къайси, къаймах тIуьнан,

Яб гуз Шимин булахриз?

Шагь яйлахрин сумах тIуьнан,

Вирт хьиз михьи мулахрин?

Ина жедач садни сархуш,

Сустдач сугъул сятери.

Ина тадач садни нахуш,

Агакьда рехъ гъетерив!

Ина михьи хуралай нек

Хъвайибур я рухваяр!

Рушарни я гьакьван гуьрчег, —

Муьгьуьббатдин агъаяр!

Дагъда хьурай, дуьзенда куьн —

Виринра квел рагъ жеда.

Базар — Дуьзуь мумкин я цIуьн, —

Амма куь руьгь сагъ жеда!

Им за Къурушрин хуьруьз ва къурушвийриз бахшнавай чIал я. Ана Жафароври (кьуд хва — кьудни, кьилин академический образование къачуна, кьакьан чинерин сагьибар я: Седредин, Аскер, Рамазан, Ризван) кьетIен чка кьазва.

Генерал Жафарован рехъ регьятди хьайи­ди туш. Ада Къурушрин юкьван школа къизилдин медалдалди, Москвада КГБ-дин (гилан ФСБ-дин) академия яру дипломдалди акьалтIарна. Закавказьедин, Юкьван Азиядин военный округра, Афгъанистанда къуллугъна. Адаз афгъанвийрин чIал чпиз хьиз чида! А цIаярай ам хурудал “Яру гъетрен” орден, “Женгерин лайихлувилерай” медаль, хейлин маса чIехи шабагьар (СССР-дин, Россиядин ва маса уьлквейрин) алаз хтана.

СССР чукIурайдалай кьулухъ Рамазан Жа­фаровича сергьятар хуьдай кьушунрин Ке­ферпатан Кавказдин региондин управленидин Дагъустанда авай “Махачкъала” отряддин командирдин заместителвиле къуллугъна, чи государстводин цIийи сергьятар мягькемаруник вичин чIехи пай кутуна. Гьа чIавуз адаз генералдин чинни гана. (2000-йис).

Инай Рамазан Жафарович мад Афгъанистандин сергьятдал, Тажикистанда къуллугъиз рекье туна. Неинки Юкьван Азия, Россия наркобаронринни бандитрин басрухрикай хвена.

Дагъустандиз хкведалди, Рамазан Жафаровича СНГ-дин сергьятар хуьдай кьушунрин командующийрин координационный Советда къуллугъна…

Вири рекьера адахъ вичин уьмуьрдин юлдаш, аялрин диде, кьилин образование авай фармацевт Мамила Мамедовнани галай. Ихьтин вафалу садвили, шак алачиз, чи хциз а четин рекьер алудиз куьмек гана.

Къе и хизан Махачкъалада яшамиш жезва, чпин кьве велед (рушни гада) гегьенш шегь­редал акъуднава, хтулрин къайгъуда ава.

Амма Рамазан Жафаровичан чIехи къайгъударвилик Дагъустандин ва дагъустанвийрин хатасузвал таъминарунин, уьлкве санлай экстремистринни бандитрин, наркотикарни яракьар гваз чиниз къвез алахъзавай жасусрин рекьер атIунин везифаяр ква.

Гьа четин шартIара Рамазан Жафарович хьтин кас Дагъустандин Гьукуматдин вини мертебайра хьун — им, чи фикирдалди, чаз вирибуруз Аллагьдин патай гайивал я. Чи далудихъ гьакъикъи хва, гьакъикъи командир, регьберрикайни сад гала…

Ви къуршах сагърай,

Чи генерал хва!

Гъетер мад къурай

Ви къуьнерал, хва!

Яшарин къатар

Мад хьурай кьакьан!

Пак, михьи къастар

ГъвечIибур жеч кьван!..

Мердали Жалилов

Ваз юбилей тебрикзавай “Лезги газетдин” редакциядин коллектив.

 

ОСТАВЬТЕ ОТВЕТ

Войти с помощью: 
Please enter your comment!
Please enter your name here