Лезги муаллим – 1-чкадал

0
162

13-16-мартдиз Махачкъалада «Дагъустандин виридалайни хъсан жегьил муаллим» лишандик кваз республикадин сифте яз тешкилнавай конкурс кьиле фена.

Ана чпин яшар 30 йисалай виниз тушир ва чпихъ умуми образованидин идарайра кIвалахунин рекьяй 5 йисан тежриба авай жегьил муаллимри иштиракна.

Конкурс кьве паюникай ибарат тир. Сад лагьай паюна республикадин жуьреба-жуьре шегьеррин, районрин, хуьрерин мектебра зегьмет чIугвазвай 62 муаллимди «Зун алай аямдин муаллим я» темадай эссе кхьенf.

Жюриди гайи къиметрал асаслу яз, кьвед лагьай паюна иштиракун анжах 19 муаллимдиз кьисмет хьана. Конкурсдин кьвед лагьай паюнин пуд турда давам хьайи акъажунрин нетижада 1-чкадиз – «Дагъустандин виридалайни хъсан жегьил муаллим» тIварцIиз ери-бине Хив райондин Хъукьварин хуьряй тир ва алай вахтунда Махачкъаладин 37-нумрадин гимназияда инглис чIалан тарсар гузвай Самийя Алдеровна Мансурова лайихлу хьана. 2-чка Дербент шегьердин 15-нумрадин мектебдин муаллим Лейла Гьамдуллаевади ва 3-чка Къизляр шегьердин 1-нумрадин гимназиядин муаллим Татьяна Поповади кьуна.

Чаплай патахъай эрчIи патахъ пуд лагьайди Самийя Мансурова я

Лагьана кIанда, Самийя Мансуровади са шумуд йис идалай вилик агалкьунралди филологиядин илимрин кандидатвилин диссертация хвена. Ам ДГПУ-да кIвалахзавай лезги муаллим, республикадин меркезда кьиле физвай лезги хейлин мярекатрин иштиракчи, филологиядин илимрин кандидат Бике Мегьамедкеримовнадин руш я.

Чна Самийядиз – Дагъустандин виридалайни хъсан жегьил муаллимдиз нубатдин агалкьун мубаракзава ва адахъ кIвалахдин рекье мадни чIехи агалкьунар хьана кIанзава.

Чи корр.

 

Добавить комментарий