Руьгьдин ем…

0
32

Алай девирдин лезги шииратда гел­хенви Сейфудин  Тегьмез­­бегович  Шагьпазова ла­йихлу чка кьунва. Фадлай таниш кас хьуниз килигна, за адахъ галаз эдебиятдиз талукь ихтилат кьиле тухун кьетlна.

 Сейфудин стха, вун шииратдал мусалай машгъул я?

Рикlеллама, 6-классда авайла, чаз лез­ги­­ эдебиятдин муаллимди са шиир ва я куь­руь­­ гьи­кая туькIуьрунин кlвалин кlвалах га­най­­. За кьуд бендиникай ибарат шиир кхьена. Му­ал­лим­ди тарифунал вил алай зи. Ам­ма­ гьакъи­къат масад хьана… Заз амукьайди а чар вах­чун­ ва кьвечlи­ларна, ктабдин юкьва хтун хьа­на­.

Заз кlвалин вилик ацукьнавай ба­де акуна. Ктабар гьаятдин цлал эцигна, зун ба­дедин къва­лав ацукьна. КIваляй инал атай имидин руша, зи ктабар къачуна, тIуб экъуьриз башламишна. Адаз анай шиир кхьенвай чар жа­гъа­на. Чкадал эхциг лагьай зи ван атанач адаз. Шиир бадедиз кlелиз эгечlна ам. Алхишар авурдалай кьулухъ заз бадеди жибиндай акъуд­на кьве “Каракум” къенфет гана. Им зи уьмуьрда сад лагьай гонорар тир. И ма­къамда фикирдиз атай кьве цIар за ван алаз винел акъудна:

 Муаллимди къимет гана,

Бадеди кьве къенфет гана.

 Ви фикирдиз шиирдин цIарар гьихьтин дуьшуьшра къвезва?­

Къелемни чар кьуна, шиир кхьида лагьа­на ацукьзавач зун. Кхьидай гьевес хьана кlан­да ва гьа гьевесдин лепедаллаз теснифдайвал. Шиирдин цlарар чарчел авахьун патал, рикlиз къвезвай шад ва я пашман тир жуьреба-жуьре гьиссери рум гана кlанда. Алай вахтунда лезгийрихъ кхьидайбур гзаф хьанва. Шаирарни ава, шаирар яз гьисабзавайбурни. Еридиз фикир тагуз, ктабарни кlамай кьван акъудзава. Бес пешекар редакторар, рецензентар гьинва? Бязи жегьил авторрин рикlел художественный жигьетдай чlагурунар, рангар ягъунар къвезвач. Кьуру цlарар арадал гъизва. Са жуьредин темаяр, образар тикрар хъийизва. Гатфарикай, билбилдикай, кlани­дакай… тикрарунар давамарзава.

 Яратмишунри ви уьмуьрда вуч чка кьазва?

Зи уьмуьрда яратмишунри кьетIен чка кьазва. Эгер заз яратмиш­дай са кIус пай ганва­чиртIа, зи гьиссерин кьисмет гьихьтинди же­дай?­ Абур баятлухдиз хъфидай. Шиират зун па­тал руьгьдин ем, заз мекьи­ макъам­да ра­къи­­нин нур, кефсуз хьайила, зун са­гъар­дай­ дарман, зе­­гь­ем чIавуз назик шагьвар, къайи стIалрин чешме, туьнт хьайила са­­бур гудай насигьатчи, пис-хъсан, ийир-тийир чирдай тербиячини я.

 Ви къелемдикай “Кlанда заз зул” тlвар алай ктаб хкатнава. Мубаракрай! Адакай суьгьбетнайтIа кIандай…

Ам зи яратмишунрин сад лагьай кIватIал я. Ана ватандикай, муьгьуьббатдикай, халкьдин ­тIал-квалдикай теснифнавай эсерар гьатнава. КIватIалдиз ганвай тIварцIин патахъай лагьайтIа, зул хуьруьн чкада, хъуьтIелай гьазурвал акуна, гатфариз гатIунзавай кIвалах­рин­ нетижаяр кьазвай вахт я. Зулуз ина бере­­кат­ кIвалихъди ахмиш жеда. Гьар са майва булвилелди, целера ниси-шур, кьечера чIем, пайдахар хьиз, шагьвардал къугъвазвай къахар… жеда.

 Гьикаятдал машгъул яни?

Гьелелиг ваъ, амма кхьинин ниятар ава. Иншаллагь, гележег вилик ква…

 РикI алай лезги шаир ва я писатель вуж я? 

Заз чпин яратмишунар бегенмиш тир шаирар гзаф ава, амма рикI алай шаир, тажуб­ жедай кар туш, Етим Эмин я. Адан жавагьирар хьаначиртIа, зун шииратдал кьару та­хьун­ни мумкин тир…

Куругъли  КЪАЛАЖУХВИ

ОСТАВЬТЕ ОТВЕТ

Войти с помощью: 
Please enter your comment!
Please enter your name here