Са тIимил хъвер

0
37

Цаварал тефей пул

Дербентдай са сеферда Кьасумбега лотерейдин са шумуд билет къачуна. Абур ахтармишун патал ада интернет авай Къенберан патав чукурна. Ингье гьа сад, кьвед, пуд… цlувад — вири ахтармишна, къугъвана. Акъатай затlни хьанач Кьасумбегаз.

“Гьагь!” — лугьуз, пашманвилелди кьил галтадна ада.

— Цаварал фена, квахьна за ибурухъ гайи пул.

— Акl лугьумир, абур цаварал ваъ, са масадан жибиндиз фенвайди я, — Къенбера адан хирел кьел алахна.

Вири физвай чкадиз

Са шумуд йисуз, жуьреба-жуьре эцигунрин кlвалахар ийиз, ина-ана хьайи Кьасумбег хуьруьз хтанвай. Хтайвалди вичин кlеви дуст Къенберан патав фин кьетlна.

— Хийирар! Къенбер кlвале авачни? — гьаятдин къапу ахъаяй папавай жузуна Кьасумбега.

— Ваъ-е.

— Гьинва ам?

— Ам гьа вири физвай чкадиз фенва, — малумарна дишегьлиди.

Гьи-и-кl? — тешвиш хьайи ада и суал сивяй чlун галаз акъудна, — Аллагьди рагьметрай. Гьикl хьайи кар я?

Вири физвай чкадиз фенва лагьайла, Кьасумбегаз вичин дуст атlа дуьньядиз фенвай хьиз хьана. Вучиз ятlани, адан фикирдиз гьанаг атана.

— Ваъ, я залумдин хва, ам Москвадиз фенва ман. Вири физвай чка тушни мегер!? — къаб алаз рахай ихтилатдин гьакъикъат ачух хъувуна дишегьлиди.

Куругъли  КЪАЛАЖУХВИ

 

ОСТАВЬТЕ ОТВЕТ

Войти с помощью: 
Please enter your comment!
Please enter your name here