“ТЕФИ” — нубатдин гъалибвал

0
15

Са тIимил вахт идалай вилик Ке­ферпатан Осетия-Аланиядин Моз­док шегьерда футболдай (“Гъвер­гъвер” тIвар алаз) СКФО-дин­ кIвенкIвечивал къазанмишун патал 2004 ва 2005-йисара ди­дедиз хьанвай жаванрин арада адетдиз элкъвенвай турнир кьиле фена. Ана вири санлай 10 командади иш­тирак­на. Ингье абур: Дербентдин ДЮСШ (“ТЕФИ”), Моздокдин ДЮСШ, Прох­ладный шегьердин СДЮШОР, Чечен Республикадин ДЮСШ-12, Ардон шегьердин ДЮСШ, Къизлярка хуьруьн (Моз­докский район) ДЮСШ-3, Нальчикдин СДЮШОР, Малгобег шегьердин (Ингушетия) ДЮСШ, Кеферпатан Осетия-Аланиядин Дигора ва Владикавказдин (“Юно­сть”) шегьеррин ДЮСШ-ар.

Жаванрин арада гьамиша хьиз и сефердани итижлу ва къизгъин акъажунар кьиле фена. Дербентдай фенвай, кьиле насигьатчи Ибрагьим­паша Султанов акъвазнавай “ТЕФИ” командади и турнирда 3-чка кьуна. Идалайни гъейри, командадин капитан (центральный защитник), ше­гьер­дин 18-нумрадин гимназияда кIел­завай Аман Бабаханов виридалайни хъсан къугъвадайди, “ТЕФИ” командадин центральный гьужумдайди тир, Дербентдин 20-нумрадин юкьван школада кIелзавай Али Къур­банов турнирдин виридалайни хъсан бомбардир яз гьисабна.

Малум хьайивал, “ТЕФИ” командадик Дербентдин 18-нумрадин гимназияда чирвилер къачузвай 7 аял ква. Турнирдилай кьу­лухъ­ хьайи мярекатдал командадин тренердив ва футболистрив дипломар, грамотаяр ва къиметлу пишкешар вахкана.

СКФО-дин футболдин майданра къазанмишнавай нубатдин агалкьун командадин тренер Ибрагьимпаша Султановаз ва санлай вири командадиз, гьакIни командадин спонсорриз — “ТЕФИ” фирмадин кьиле авай ксариз: Т.Г.Гьамзаеваз ва Ф.С.Сагъуеваз (футболдин командадал “ТЕФИ” фирмадин тIвар­ни гьавиляй ала), ДЮСШ-дин директор Н.Я.Эмирбеговаз, 18-нумрадин гимназиядин директор Н.М.Юзбеговаз  шегьердин спортдин общественностди, футболдин ветеранри, аялрин диде-бубайри рикIин сидкьидай тебрикзава.

Алай вахтунда команда Дербентда “ТЕФИ”-дин Кубок патал гьар йисуз кьиле тухун адет хьанвай международный турнирдиз гьазур жезва. Ам июндин эхирриз ва июлдин сифте кьилера кьиле фида.

Эдуард  Багъишев

ОСТАВЬТЕ ОТВЕТ

Войти с помощью: 
Please enter your comment!
Please enter your name here