«Ватандин тIвар чими я»

0
11

Ватан хуьз…

Халкьнава чун Аллагьди,

Гьарда вичин Ватан хуьз,

Зунни абурукай я сад,

Ам патал чан къурбандиз.

 

КичIе туш заз акъвазиз

Душмандин хура.

Вуч ава кьван дуьньяда

Ватан хьиз багьа!

 

Ам зи шадвал, гьевес я,

Хуьзавай зун нефес я.

Чи уьмуьр ятIан куьруь,

Ватандин тIвар я чими…

 

Гатфар

Йиса садра къвезва гатфар,

Чилелай пас алудиз.

Зазни ада гузва нурар,

РикIевай яс акъудиз.

 

ЭкъечIзава зунни къецел

Гатфарин къуз гуьлуьшан.

Аладарзава ада зи рикI,

Уьмуьрда тир перишан.

 

Хиялар

Хияларни гьакъикъат

Жезвач душуьш сад-садал.

Икрагь я зун абурукай,

Кар алачиз арадал.

 

Хиялрикай авач хийир,

Абуру гуда рикIиз зиян.

Квахьнавай хьиз ийир-тийир,

Къведайбур туш я лагьай ван.

 

Дагълар

Зун дагъларин юкьва ава,

Яргъаз тахьуй зун абурувай.

Вуч гуьрчег я килигайла,

Гъетерин нур лап мукьвалай.

 

На лугьуди, агакьда гъил,

Хкаж хьайитIа дагъдин кукIвал,

Дуьнья вири аквада заз,

Кьунавай хьиз капан юкьвал.

 

Аквада мад йигин вацIар,

Физвай катна гьуьлуьхъ дерин.

Гвачни дамах цуькверивни,

Ава лугьуз дагъда серин.

 

Мал-къарадиз я хупI дигай,

Таза къацу векьер авай.

Шаирдив гакьада гафар,

Аватай хьиз вили цавай.

 

Булахдини яда мани,

Чибур лугьуз дагълар вири.

Дамахзава зани абурал,

Я лугьуз ам Ватан, ери.

 

Низ кIан жеда?

Зайиф жеда экуь вилер,

Япаризни гуда эсер.

Муьрхъуь кьада къелемдини,

Герен-герен хада кIвенкIвер.

 

Яваш хьанва зи руьгьни чан,

Амач къуват, я кIус аман.

Кьуьзуь хьана низ жеда кIан,

Мукьва жезвай эхир залан.

 

Кьуьзуь хьайила кьурада тар,

Хкин тийиз къацу пешер.

Инсанарни гьакI тушни бес,

Вахчуз тежез хъсан бегьер.

 

Хъчад афар

Амач гила хъуьтIуьн къаяр,

И мукьвара жеда гатфар.

Гзафни-гзаф хвеши я заз,

Неда лугьуз хъчад афар.

 

ЭкъечIайла кIваляй къецел,

Гьатда нера хъчарин ял.

Са ни ятIан къуншийрикай

Чразва кьван афар къулал.

 

Пагь, дад галай затI я афар,

Авай къене таза хъчар.

Гьазур я зун, жагъайтIа ам,

Иштягьдалди нез юкъуз гьар.

Ингилжагьан Алистанова, Махачкъала

 

Добавить комментарий