Юбилеяр мукьвал ала

0
7

Кьве югъ идалай вилик Дагъустандин пи­сателрин Союзда Лезги секциядин нубатдин заседание кьиле фена.

Анал гъанвай месэлайрин гьакъиндай Да­­­гъустандин писателрин Союздин секретарь, Дагъустандин халкьдин писатель Абдуселим Исмаилова лагьана:

— Вахт, дугъриданни, четинди хьанва, кризисди чунни кIеве твазва. Эгер икьван гагьда республикадин Гьукуматди писателрин Союз патал бюджетдик тайин кьадар пул кутаз­вай­ди­ тиртIа, гила са кепекни кутунвач. Гьавиляй­ чаз та­лукь месэлаяр гьялун чи хиве гьатзава ва чун авай мумкинвилерикай менфят къа­чуз­, сада-садаз куьмекни гуз гьазур хьана кIан­да.­

А.Исмаилова малумарайвал, СтIал Сулейманан кайи музей арадал хкун патал гзаф инсанри зегьмет чIугвазва. И кардик гьар са ватанэгьлиди вичин пай кутуна кIанда. Музей­диз СтIал Сулейманан уьмуьрдихъ, девирдихъ, яратмишунрихъ галаз алакъалу шейэр, ктабар, шикилар, суьретар агакьар­найтIа, вирида разивалдай кар жедай.

ЦIи лезги са шумуд писателдин­ юбилеяр жезва. Абурни дуьзгуьндаказ кьиле тухун къе­нин несилдин, вилик-кьилик квай ватанэгьлийрин буржарикай я.

Сифте нубатда Кьуьчхуьр Саидан 250 йи­сан юбилейдиз гьазурвилер акуна кIанзава. И месэладикай са варз вилик “Лезги газетда­ни” макъала чапнавай. Малум тирвал, “Кьурагь район” муниципалитетдиз, Бугъдатепе хуьруьн (Кьуьчхуьр) администрациядиз женгчи, бунтчи шаирдин юбилей жезвайдакай хабар ава, инанмишвал ийиз кIанзава хьи, абуру лазим тир серенжемарни кьабулда. Аб­дуселим Исмаилова лагьайвал, писателрин Союзни кьулухъ акъваздач.

Секциядал профессор литературовед Гьа­жи Гашарован, шаир Кичибег Мусаеван 80 йисан, драматург Эседуллагь Наврузбего­ван 75, Дагъустандин халкьдин писатель, драматург Абдуселим Исмаилован 70, ша­­ир Зульфикъар Къафланован 60 йисан юбилеяр къейд авуниз гьазурвилер акуникайни ихтилат кватна. Идаз талукь яз чпин фики­рар Дагъустандин халкьдин шаирар Ханби­че­ Хаметовади, Арбен Къардаша, филологиядин илимрин докторар, писателар Къурбан Акимова, Фейзудин Нагъиева, драматург Ислам Мегьа­ме­дова, публицист, писатель На­риман Ибрагьимова, шаир Агъалар Исмаи­лова ачухна.

КIватI хьанвайбуру милли литературадиз, чIа­лаз талукь маса месэлаярни веревирд авуна­.

Хийир Эмиров

Добавить комментарий